صدر رجب طیب اردوان کی ترکیہ کے 103 ویں یوم جمہوریہ پر قوم کو مبارک باد

ترکیہ کے صدر نے بیرون ملک ترک سفارتی مشنز میں قومی دن کی خوشیاں منانے والے مہمانوں کا شکریہ ادا کیا۔ انہوں نے ان تمام دوستوں اور بھائیوں کا بھی خیرمقدم کیا جن کے دل ترک قوم کے ساتھ دھڑکتے ہیں اور جو خوشی اور غم میں اس کے شریک ہیں۔

ترک صدر نے کہا کہ جمہوریہ ترکیہ اس عزم کی مضبوط ترین مثال ہے کہ ترک قوم آزادی کے ساتھ زندگی گزارنا، اپنی خودمختاری برقرار رکھنا اور اپنے مستقبل کا فیصلہ خود کرنا چاہتی ہے۔

انہوں نے کہا کہ ’جمہوریہ ترکیہ کے بانی مصطفیٰ کمال اتاترک کی قیادت میں قومی جدوجہد نے دنیا کو دکھایا کہ متحد قوم انتہائی مشکل حالات میں بھی کیا کچھ حاصل کرسکتی ہے۔‘

انہوں نے کہا کہ ترکیہ ’گھر میں امن، دنیا میں امن‘ کے اصول کے تحت امن اور انصاف کے لیے کام کرنے کا عزم برقرار رکھے گا۔

ترک صدر نے مزید کہا کہ ’103 سال قبل قوم نے جس عزم، حوصلے اور ثابت قدمی کا مظاہرہ کیا تھا، وہ آج بھی تحریک کا ایک اہم ذریعہ ہے۔‘

ان کے مطابق گزشتہ 24 برسوں کے دوران دفاعی صنعت، توانائی، ٹرانسپورٹ اور سفارت کاری سمیت مختلف شعبوں میں ہونے والی پیش رفت ایک بااثر اور خوشحال ترکیہ کی جانب سفر میں اہم سنگِ میل ہے۔