انگور اڈہ پر فائرنگ کا جواب، پاکستان آرمی نے افغان طالبان کی متعدد چوکیوں کو تباہ کر دیا

ریڈیو پاکستان کے مطابق منگل کو انگور اڈہ کے علاقے میں پاک افغان سرحد پر افغان طالبان کی جانب سے مبینہ بلااشتعال فائرنگ کا پاک فوج نے بھرپور جواب دیا۔

رپورٹ میں کہا گیا کہ پاک فوج نے بھاری ہتھیاروں کا استعمال کرتے ہوئے افغان طالبان اہلکاروں کو اپنی چوکیاں چھوڑ کر فرار ہونے پر مجبور کردیا۔

رپورٹس کے حوالے سے بتایا گیا ہے کہ کارروائی کے دوران افغان طالبان حکومت کے متعدد اہلکار بھی ہلاک ہوئے۔ رپورٹ میں کہا گیا کہ ’سیکیورٹی فورسز ملک کے دفاع اور عوام کے تحفظ کے لیے پُرعزم ہیں اور قومی سلامتی پر کوئی سمجھوتہ نہیں کیا جائے گا۔‘

منگل کو افغان سیکیورٹی فورسز نے انگور اڈہ کے سرحدی علاقے میں پاکستانی فوجی چوکیوں اور رہائشی علاقوں پر مبینہ فائرنگ کی تھی، جس کے نتیجے میں ایک مقامی شہری ہلاک اور ایک ہی خاندان کے پانچ افراد زخمی ہوگئے تھے۔

حکام کے مطابق فائرنگ افغان حدود کے اندر قائم چوکیوں سے کی گئی، جس میں ’سنائپر رائفلز‘ سمیت بھاری ہتھیار استعمال کیے گئے۔

ذرائع کا کہنا ہے کہ پاکستانی فورسز نے فوری جوابی کارروائی کرتے ہوئے افغان طالبان کی متعدد سرحدی چوکیوں، مارٹر پوزیشنز اور دفاعی بنکروں کو نشانہ بنایا۔

خیبر پختونخوا کے گورنر فیصل کریم کنڈی نے فائرنگ کی مذمت کرتے ہوئے کہا تھا کہ ’پاکستان اپنے عوام پر حملے یا اپنی خودمختاری کی خلاف ورزی کبھی برداشت نہیں کرے گا۔‘

دوسری جانب پاکستان نے واقعے سے متعلق افغان وزارت دفاع کے اس بیان کو ’جھوٹ کا پلندہ‘ قرار دیتے ہوئے مسترد کردیا تھا۔

انگور اڈہ سرحدی گزرگاہ پاک افغان سرحد کی اہم اور حساس گزرگاہوں میں شمار ہوتی ہے۔ یہ دونوں ملکوں کے درمیان تجارت اور عوامی آمدورفت کا ایک اہم راستہ ہے۔