فلوریڈا میں پرائیویٹ جیٹ طوفانی بارش کے دوران گر کر تباہ، 9 افراد ہلاک

امریکی فیڈرل ایویشن ایڈمنسٹریشن نے کہا ہے کہ ’لیئر جیٹ 60 ٹیکساس کے آسٹن برگسٹروم انٹرنیشنل ایئرپورٹ سے روانہ ہو کر بہاماس کے نارتھ ایلیوتھرا ایئرپورٹ جا رہا تھا۔‘

طیارہ مقامی وقت کے مطابق تقریباً دوپہر 12 بج کر 50 منٹ پر گرا اور اس میں 9 افراد سوار تھے۔

واضح رہے کہ حادثے کی جگہ امریکی صدر ڈونلڈ ٹرمپ کی مار-اے-لاگو سٹیٹ سے چند کلومیٹر کے فاصلے پر واقع ہے۔

پام بیچ کاؤنٹی فائر ریسکیو نے امریکی سوشل میڈیا پلیٹ فارم ایکس پر طیارے کے حادثے کر بارے میں لکھ کر عوام کو علاقے سے دور رہنے کی ہدایت کی۔

پام بیچ کاؤنٹی کے کمشنر جوئل فلورس نے ایک پریس کانفرنس میں بتایا کہ ’اس حادثے کے نتیجے میں موبائل ہوم پارک کے داخلی راستے کے قریب سڑک پر ایک بہت بڑا گڑھا بن گیا ہے۔‘

انہوں نے مزید کہا کہ ’اس علاقے سے تقریباً 600 افراد کو محفوظ مقامات پر منتقل کیا جا رہا ہے اور انہیں کاؤنٹی میں قائم پناہ گاہوں میں رکھا جائے گا۔‘

امریکی وفاقی ادارہ نیشنل ٹرانسپورٹیشن سیفٹی بورڈ، فیڈرل ایویشن ایڈمنسٹریشن کے ساتھ مل کر تحقیقات کی قیادت کرے گا۔

فلائٹ ٹریکنگ ویب سائٹ ’فلائٹ ریڈار 24‘ نے کہا کہ اعداد و شمار سے ظاہر ہوتا ہے کہ اس موقع پر نیچے کی جانب اترنے کی رفتار 32,000 فٹ فی منٹ سے تجاوز کر گئی تھی۔‘

جبکہ امریکی حکام نے اب تک طیارہ گرنے کی وجہ نہیں بتائی۔