امریکہ کا ایران پر کوئی بھی حملہ پاگل پن ہوگا: نوبیل انعام یافتہ مصری سیاست دان

قطری چینل الجزیرہ کے مطابق محمد البرادعی نے سوشل میڈیا پلیٹ فارم ایکس پر لکھا کہ ’ایران پر امریکا کا کوئی بھی حملہ ’پاگل پن کا اقدام‘ ہوگا اور اس سے صرف مزید تشدد اور تباہی پھیلے گی۔‘

انہوں نے مزید کہا کہ ’وہ ان تمام افراد سے اپیل کرتے ہیں جن کا امریکی صدر ڈونلڈ ٹرمپ پر اثرورسوخ ہے کہ وہ انہیں اس اقدام سے روکنے کے لیے اپنی پوری کوشش کریں۔‘

محمد البرادعی اور بین الاقوامی جوہری توانائی ایجنسی کو سنہ 2005 میں مشترکہ طور پر نوبیل امن انعام دیا گیا تھا۔ انہیں یہ انعام جوہری توانائی کے فوجی مقاصد کے لیے استعمال کی روک تھام کی کوششوں پر دیا گیا۔

محمد البرادعی نے سال 2013 میں مختصر مدت کے لیے مصر کے نائب صدر کے طور پر بھی خدمات انجام دیں۔

محمد البرادعی اس سے قبل بھی کہہ چکے ہیں کہ ایران کے خلاف طاقت کے استعمال کا کوئی فوری اور واضح خطرہ موجود نہیں جو فوجی کارروائی کا جواز فراہم کرسکے۔ ان کے مطابق بین الاقوامی قوانین کے تحت بھی ایسے اقدام کے لیے قانونی اختیار موجود نہیں، جبکہ ’اپنی مرضی سے شروع کی جانے والی جنگوں‘ کی قیمت انتہائی ہولناک ہوتی ہے۔

ان کی اپیل ایسے وقت میں سامنے آئی ہے جب خطہ ماضی کی فوجی جارحیت کے نتائج سے دوچار ہے۔ ان کا مؤقف ہے کہ امریکا کے یکطرفہ اقدامات میں مذاکرات کے بجائے طاقت کے استعمال کو ترجیح دینا غیر ذمہ دارانہ طرزِ عمل ہے۔