’ووٹر ناراض تھے‘، ڈونلڈ ٹرمپ نے مڈٹرم الیکشن میں شکست کی وجہ ایران جنگ کو کہہ دیا

ڈونلڈ ٹرمپ نے بدھ کو وسط مدتی انتخابات کے بعد فاکس نیوز سے گفتگو کرتے ہوئے کہا ’لوگ ایران کے معاملے پر میرے اقدامات سے اتفاق کرتے ہیں۔‘

لیکن غالباً وہ پٹرول کے لیے زیادہ قیمت ادا کرنے کے قلیل مدتی نتائج برداشت کرنے پر آمادہ نہیں تھے۔‘

انہوں نے قیمتوں میں اضافے کے دباؤ کو ’ایک قلیل مدتی مسئلہ، لیکن طویل مدتی فائدے‘ کا ذریعہ قرار دیا۔

ڈونلڈ ٹرمپ نے خبردار کیا کہ اگر تہران نے تعاون نہ کیا تو امریکی افواج ’کام مکمل کر سکتی ہیں‘۔ تاہم ان کا کہنا تھا کہ اگر سفارتی معاہدے کے ذریعے جوہری ہتھیاروں پر پابندیوں کو لازم اور قابلِ عمل بنایا جائے تو ایران کے ساتھ معاہدہ اب بھی ممکن ہے۔

انہوں نے اسرائیل کی امداد میں کٹوتی کے اپنے فیصلے کا بھی دفاع کیا اور کہا کہ اسرائیل ’کافی امیر ہو چکا ہے‘ اور اسے اب سالانہ چار ارب ڈالر کی امریکی امداد کی ضرورت نہیں رہی۔

امریکی صدر کے یہ بیانات ایسے وقت سامنے آئے ہیں جب امریکی ذرائع ابلاغ کے ابتدائی اندازوں کے مطابق ڈیموکریٹس سینیٹ کا کنٹرول حاصل کرنے میں کامیاب رہے ہیں۔ جبکہ ایوانِ نمائندگان میں بھی اکثریت حاصل کرنے کے قریب ہیں۔ اس پیش رفت سے ٹرمپ کے قانون سازی کے ایجنڈے کو محدود کرنے کا خدشہ ہے۔

انتخابی نتائج تسلیم کرتے ہوئے ٹرمپ نے حزب اختلاف کے امیدواروں کی بھرپور انتخابی مہم کی تعریف کی اور کہا کہ وہ ڈیموکریٹس کے ساتھ امیگریشن سمیت کئی معاملات پر کام کر سکتے ہیں۔

ڈونلڈ ٹرمپ نے الگ سے پولیٹیکو کو بتایا کہ انہیں قانون سازی کو ویٹو کرنے کا آئینی اختیار حاصل ہے، تاہم وہ دو سال تک بلوں کو ویٹو کرنے کے بجائے قانون سازوں کے ساتھ مل کر کام کرنے کو ترجیح دیں گے۔