’انشا اللہ کو الحمدللہ میں بدل سکتے ہیں‘ عبدال السید امریکی سینیٹ کے پہلے مسلمان رکن منتخب

ترکیہ کی خبر ایجنسی انادلو کی رپورٹ میں بتایا گیا ہے کہ امریکی ذرائع کے ابتدائی اندازوں کے مطابق اس کامیابی کے ساتھ وہ سینیٹ کے لیے منتخب ہونے والے پہلے مسلمان بن گئے ہیں۔

عبدال السید پیشے کے لحاظ سے ڈاکٹر اور صحتِ عامہ کے سابق عہدیدار ہیں۔ انہوں نے ڈیموکریٹ جماعت کے سخت مقابلے والے ابتدائی انتخابات میں کامیابی حاصل کرنے کے بعد ریٹائر ہونے والے سینیٹر گیری پیٹرز کی خالی کردہ نشست پر انتخاب لڑا تھا۔

ان کی تاریخی کامیابی ایک متنازع انتخابی مہم کے بعد سامنے آئی جس کے دوران ان کا مذہبی پس منظر اہم موضوع بن گیا تھا۔ صدر ڈونلڈ ٹرمپ اور دیگر ریپبلکن رہنماؤں نے بارہا ان کے مذہب کو تنقید کا نشانہ بنایا۔

عبدال السید نے انتہا پسندی سے تعلق کے الزامات مسترد کیے تھے۔

یہ کامیابی اس ریاست میں حاصل ہوئی ہے جہاں 2024 کے صدارتی انتخابات میں ٹرمپ نے معمولی فرق سے کامیابی حاصل کی تھی۔

نئی کانگریس کے جنوری میں اجلاس کے آغاز پر عبدال السید امریکی سینیٹ کے پہلے مسلمان رکن کی حیثیت سے حلف اٹھائیں گے۔

عبدال السید نے بدھ کی صبح اپنی متوقع کامیابی کا جشن منایا اور انتخابی مہم کے اختتامی اجتماع میں حامیوں سے جذباتی خطاب کرتے ہوئے ٹرمپ اور نائب صدر جے ڈی وینس کو بھی تنقید کا نشانہ بنایا۔

انہوں نے مشی گن کے ووٹرز کا شکریہ ادا کیا اور عزم ظاہر کیا کہ وہ امریکی سینیٹ میں بھی اسی عزم، کشادہ دلی اور ہمدردی کے ساتھ کام کریں گے جو ووٹرز نے انتخابی مہم کے دوران دکھائی۔

انہوں نے اپنے حامیوں پر زور دیا کہ وہ اس نتیجے کو اجتماعی کامیابی کے طور پر منائیں۔ ان کے مطابق یہ نتیجہ سیاسی مخالفین کی شکست اور ایک بڑے مقصد کے لیے مہم چلانے والوں کی کامیابی ہے۔