اسرائیلی فوج شہر الخلیل کے تمام علاقوں سے واپسی، فلسطینی فورسز نے کنٹرول سنبھال لیا

ترکیہ کی خبر ایجنسی انادلو کی رپورٹ کے مطابق خالد دودین نے کہا ہے کہ ’اسرائیلی فوج کے انخلا کے بعد فلسطینی سیکیورٹی فورسز نے علاقے کا مکمل کنٹرول سنبھال لیا ہے۔‘

انہوں نے کہا کہ ’جن خاندانوں کو اپنے گھروں سے نقل مکانی پر مجبور کیا گیا تھا، وہ اب واپس آسکتے ہیں۔‘

گورنر کا کہنا تھا کہ متعلقہ حکام اور فلسطینی سیکیورٹی فورسز زمینی صورت حال کی نگرانی کر رہی ہیں اور شہریوں کی محفوظ واپسی کے لیے ضروری انتظامات کیے جا رہے ہیں۔

اسرائیلی فوج نے 23 اکتوبر کو ویسٹ بینک کے شہر الخلیل میں کارروائی شروع کی تھی۔ یہ کارروائی دو فلسطینیوں کے فائرنگ کے حملے کے بعد شروع کی گئی تھی، جس میں دو اسرائیلی فوجی ہلاک اور تین زخمی ہوئے تھے۔ بعد ازاں اسرائیلی فورسز نے حملے میں ملوث دونوں فلسطینیوں کو ہلاک کردیا تھا۔

10 روزہ کارروائی کے دوران اسرائیلی فوج نے شہر اور اس کے اطراف کے دیہات میں آمدورفت بند کردی تھی۔

اس کارروائی کے دوران فلسطینیوں کو جبری طور پر بے گھر کیا گیا، گھروں، دیگر عمارتوں اور تجارتی املاک کو مسمار کیا گیا جبکہ بنیادی ڈھانچے کو بھی نقصان پہنچا۔

الخلیل گورنریٹ کے مطابق اس کارروائی سے 3 ہزار 300 سے زائد فلسطینی بے گھر ہوئے یا متاثر ہوئے اس دوران 15 مکانات اور دیگر عمارتیں بھی مسمار کی گئیں۔

گورنریٹ کا کہنا ہے کہ’ کارروائی سے مقامی معیشت اور بنیادی ڈھانچے کو نقصان پہنچا جبکہ تعلیمی سرگرمیاں بھی متاثر ہوئیں۔‘