وینزویلا میں زلزلے سے ہلاکتوں کی تعداد 1500 کے قریب پہنچ گئی، ہزاروں افراد اب بھی لاپتا

ملبے تلے دبے چند افراد کے زندہ ملنے کے بعد رضاکاروں اور امدادی اہلکاروں کو مزید لوگوں کے زندہ ہونے کی امید ہے۔ تاہم ہزاروں افراد لاپتا ہیں جن کے ملبے تلے دبے ہونے کا اندیشہ ہے کیوں کہ درجنوں عمارتیں ملبے کے ڈھیر میں بدل چکی ہیں۔

حکام کے مطابق اتوار کو مزید 20 لاشیں نکالے جانے کے بعد ہلاکتیں 1450 تک پہنچ گئی ہیں جب کہ زخموں کی تعداد 3150 ہے۔ 774 عمارتیں منہدم ہوئی ہیں جب کہ 12 ہزار 721 افراد بے گھر ہو گئے ہیں۔

سرکاری اعداد و شمار میں صرف سینکڑوں افراد کے لاپتا یا ملبے تلے دبے ہونے کا ذکر ہے۔ تاہم ملک کی اپوزیشن جماعت کی ویب سائٹ پر تقریباً 50 ہزار افراد کو لاپتا بتایا گیا ہے۔

ریسکیو کے عمل میں حصہ لینے کے لیے بین الاقوامی امدادی ٹیمیں بھی وینزویلا پہنچ رہی ہیں۔ تقریباَ 2600 غیر ملکی امدادی اہلکار وینزویلا پہنچ چکے ہیں تاہم وہاں بھاری مشینری کی قلت ہے جس کی وجہ سے امدادی کاموں میں مشکلات کا سامنا ہے۔

وینزویلا کی عبوری صدر ڈیلسی روڈریگیز نے اتوار کو اپنے بیان میں کہا کہ ریسکیو آپریشنز جاری ہیں اور ہم مزید لوگوں کی زندگی کے بارے میں پرامید ہیں۔

امدادی اہلکاروں کا کہنا ہے کہ زلزلے کے بعد ملبے تلے دبے لوگوں کو نکالنے کے لیے 72 گھنٹوں کا وقت بہت اہم ہوتا ہے۔ کیوں کہ اس میں لوگوں کے زندہ بچنے کے امکانات زیادہ ہوتے ہیں۔ اس کے بعد امکانات معدوم ہوتے جاتے ہیں۔

وینزویلا میں جمعرات کو آنے والے 7.2 اور 7.5 شدت کے زلزلوں کو 72 گھنٹے ہفتے کو ہی مکمل ہو چکے ہیں تاہم اتوار کو بھی بعض افراد کو زندہ نکالا گیا ہے۔

امریکی جیولوجیکل سروے نے اندازہ ظاہر کیا ہے کہ ہلاکتوں کی تعداد 10 ہزار تک پہنچ سکتی ہے۔ اگر ایسا ہوا تو یہ لاطینی امریکی خطے کی تاریخ کا سب سے تباہ کن زلزلہ ہوگا۔

ملبے تلے پھنسے باپ بیٹے کو چار دن بعد بحفاظت نکال لیا گیا

ریسکیو اہلکاروں نے زلزلے کے چار دن بعد یعنی اتوار کو ایک عمارت کے ملبے تلے دبے باپ اور اس کے بیٹے کو زندہ ریسکیو کیا ہے۔ ان دونوں کو بچانے کے لیے امدادی ٹیموں نے مسلسل 12 گھنٹے کوششیں کیں۔

ریسکیو اہلکاروں نے خصوصی کیمروں کی مدد سے ملبے کی چھان بین کی اور ملبے میں پھنسے باپ بیٹے تک پہنچنے میں کامیاب ہوئے۔

اس سے قبل ہفتے کو ایک ماں اور اس کے 9 ماہ کے بچے کو بھی ملبے سے بحفاظت زندہ نکالا تھا۔