امارات کے جوہری بجلی گھر پر ڈرون حملہ اور سعودی عرب کا تین ڈرون گرانے کا دعویٰ، جرمنی کی جانب سے ایران کی مذمت

فریڈرک مرز کا کہنا ہے کہ جرمنی متحدہ عرب امارات اور دیگر شراکت داروں پر ایران کے حالیہ فضائی حملوں کی شدید مذمت کرتا ہے۔ جرمن چانسلر نے امارات کی 'جوہری تنصیبات' پر حملے کو پورے خطے کے عوام کی سلامتی کے لیے خطرہ قرار دیا۔

واضح رہے کہ متحدہ عرب امارات نے اتوار کو کہا تھا کہ ابو ظہبی کے قریب اس کے براکہ جوہری بجلی گھر کے باہر ایک ڈرون حملہ ہوا ہے جس کے نتیجے میں بجلی پیدا کرنے والے ایک جنریٹر میں آگ لگ گئی۔

متحدہ عرب امارات کی جانب سے جاری بیانات میں کسی ملک کا نام نہیں لیا گیا تھا۔ بلکہ صرف یہ کہا تھا کہ ڈرون 'مغربی سرحد' سے آئے تھے۔

جرمن چانسلر کا مزید کہنا تھا کہ ایران کو چاہیے کہ وہ امریکہ کے ساتھ سنجیدہ مذاکرات کرے، اپنے پڑوسیوں کو دھمکانا بند کرے اور آبنائے ہرمز کو بحال کرے۔

دوسری جانب سعودی عرب نے کہا ہے کہ اس نے عراق سے آنے والے تین ڈرونز کو مار گرایا ہے۔ ریاض نے تنبیہ کی ہے کہ اس کی خودمختاری اور سلامتی کی خلاف ورزیوں کی کوششوں کا جواب دینے کے لیے تمام ضروری اقدامات کیے جائیں گے۔