امریکہ اسرائیل کی ایران پر جنگ میں 20 سے 30 مسافر طیارے تباہ ہوئے: ایران ایئر

انادولو ایجنسی نے ایران کے نیم سرکاری خبر رساں ادارے تسنیم کے حوالے سے بتایا کہ طاہر عبدالہی نے ایک نیوز کانفرنس میں کہا کہ ’ایران کو تقریباً ایک ہزار مسافر طیاروں کی ضرورت ہے، تاہم اس وقت ملک کے پاس قریب 300 طیارے ہیں۔‘

ان کے مطابق جنگ سے پہلے ان میں سے 130 سے 140 طیارے آپریشنل تھے، جبکہ جنگ کے دوران 20 سے 30 طیارے تباہ ہوئے۔ انہوں نے مزید کہا کہ تنازع کے دوران 70 سے 80 طیاروں کو نشانہ بنایا گیا۔

ایران ایئر کے سربراہ نے دعویٰ کیا کہ اسرائیلی حملوں سے کمپنی کے طیاروں کو شدید نقصان پہنچا۔ ان کے مطابق دیگر فضائی کمپنیوں کے بعض طیاروں کو ایک ایک میزائل سے نشانہ بنایا گیا، جبکہ ایران ایئر کا ایک طیارہ مکمل طور پر تباہ ہوگیا۔

طاہرعبدالہی نے کہا کہ ’بین الاقوامی پابندیوں اور دیگر رکاوٹوں نے ایران ایئر کی سرگرمیوں کو کمزور کیا ہے، جس سے آپریشنل طیاروں کی تعداد کم اور منافع بخش فضائی روٹس تک رسائی محدود ہوئی۔‘

انہوں نے طیاروں کے پرزوں کے حصول میں مشکلات، مالی وسائل کی کمی اور عملے سے متعلق مسائل کو بھی کمپنی کو درپیش بڑے چیلنجز قرار دیا۔