ویسٹ بینک میں اسرائیلی آبادکاروں نے مسجد کو آگ لگا کر دیواروں پر نعرے لکھ دیے

مسجد کے قریب رہنے والے فلسطینی شہری عطا کنعان نے خبر رساں ادارے اے ایف پی کو بتایا کہ بدھ کی رات شیشے ٹوٹنے کی آواز سن کر وہ فوری طور پر مسجد پہنچے۔

انہوں نے کہا کہ ’مسجد میں شدید آگ لگی ہوئی تھی، جس پر انہوں نے فائر بریگیڈ کو اطلاع دی۔‘ ’نوجوان بھی آگ بجھانے والے آلات لے کر مدد کے لیے پہنچے اور آگ کو پوری عمارت میں پھیلنے سے روکنے کی کوشش کی۔‘

اسرائیلی فوج نے اے ایف پی کو بتایا کہ ’مسجد پر نعرے لکھے جانے، آگ لگنے اور ایک گاڑی کو نقصان پہنچانے کی اطلاع ملنے کے بعد فوجی اہلکار مخماس روانہ کیے گئے۔ فوج کے مطابق کسی مشتبہ شخص کی شناخت نہیں ہو سکی، تاہم واقعے کی تحقیقات شروع کر دی گئی ہیں۔

فرانسیسی خبر ایجنسی اے ایف پی کی ویڈیو میں مسجد کے اندرونی حصے میں قالین جلنے اور دیواروں پر سیاہی کے نشانات دیکھے جا سکتے ہیں۔ اے ایف پی کے ایک صحافی کے مطابق مسجد کی بیرونی دیواروں پر عبرانی زبان میں سپرے پینٹ سے ’صرف اس لیے کہ ہم خاموش ہیں، اس کا مطلب یہ نہیں کہ ہم سو رہے ہیں‘ جیسے نعرے بھی لکھے گئے۔

عطا کنعان کے مطابق آبادکاروں نے ایک گاڑی کو بھی آگ لگائی۔ ان کا کہنا تھا کہ آبادکاروں کی جانب سے گھروں کو نذرِ آتش کیے جانے کے خدشے کے باعث گاؤں کے رہائشی حالیہ ہفتوں میں رات کے وقت پہرہ دے رہے ہیں۔

فلسطینی قومی کونسل کے صدر نے مسجد پر آتش زنی کے واقعے کو ’وحشیانہ کارروائی اور آبادکاروں کی دہشت گردی میں خطرناک اضافہ‘ قرار دیا۔