طالبان حکومت نے افغانستان میں بی بی سی کی ’ایف ایم‘ نشریات معطل کر دیں

طالبان حکومت کے ترجمان نے کہا کہ ’بی بی سی کو بار بار خلاف ورزیوں کی وجہ سے معطل کیا گیا ہے۔‘ تاہم انہوں نے خلاف ورزیوں کی نوعیت کے بارے میں کوئی تفصیل فراہم نہیں کی۔

واضح رہے کہ ’2022 میں افغانستان میں امریکی نشریاتی اداروں کے کام کرنے پر پابندی لگائے جانے کے بعد سے ’بی بی سی‘ واحد بین الاقوامی خبر رساں ادارہ رہا ہے جو وہاں سے نشریات جاری رکھے ہوئے ہے۔

بی بی سی کا رد عمل

بی بی سی براڈکاسٹر نے ایک بیان میں کہا کہ ’افغانستان بھر میں لاکھوں افراد درست خبروں اور معلومات کے لیے بی بی سی پر انحصار کرتے ہیں اور ہم حکام کے ساتھ مل کر اس صورتحال کو حل کرنے کی کوشش کر رہے ہیں۔‘

بی بی سی نے کہا کہ ’وہ افغانستان میں اپنے سامعین کے لیے پشتو، دری اور انگریزی زبانوں میں شارٹ ویو اور میڈیم ویو ریڈیو، آن لائن اور سیٹلائٹ کے ذریعے آزادانہ طور پر خبریں پہنچانے کا سلسلہ جاری رکھے ہوئے ہے۔‘

بی بی سی ہر ہفتے افغانستان کی 20 فیصد سے زائد آبادی تک خبریں پہنچاتا ہے، جس میں خبریں اور خاص طور پر ان لڑکیوں کے لیے تعلیمی پروگرام شامل ہیں جنہیں طالبان حکومت نے سیکنڈری تعلیم سے محروم کر رکھا ہے۔

طالبان کی وزارتِ اطلاعات و ثقافت کے ترجمان خبیب غفران نے مقامی میڈیا کو بتایا کہ ’بی بی سی میڈیا آؤٹ لیٹ کی جانب سے مسلسل خلاف ورزیوں کی وجہ سے فی الحال ملک بھر میں اس کی سرگرمی معطل کرنے کا فیصلہ کیا گیا ہے۔‘

طالبان کا میڈیا پر کنٹرول

طالبان حکومت کا ملک میں کام کرنے والے میڈیا پر سخت کنٹرول ہے۔

طالبان کی جانب سے 2021 میں دوبارہ اقتدار سنبھالنے کے بعد سے ملک میں ریڈیو اور ٹی وی پر موسیقی نشر کرنے پر پابندی ہے۔ جبکہ خواتین اینکرز کی سکرین پر موجودگی محدود کر دی گئی ہے اور وہ مرد ساتھیوں کے ساتھ ایک ساتھ پروگرام نہیں کر سکتیں۔

لوگ اب بھی کچھ سوشل میڈیا پلیٹ فارمز استعمال کر سکتے ہیں، لیکن ملک کے بڑے حصوں میں بجلی کی عدم دستیابی، زیادہ اخراجات اور شرحِ خواندگی کی کمی اب بھی بڑی رکاوٹیں ہیں۔

واضح رہے کہ بی بی سی کی افغان سروس 1981 سے کام کر رہی ہے اور افغان عوام کے لیے معلومات کا سب سے بڑا ذریعہ سمجھی جاتی رہی ہے۔