امریکا کی ایران سے کاروبار کرنے والے غیرملکی مالیاتی اداروں کو پابندیوں کی وارننگ

امریکا نے غیر ملکی مالیاتی اداروں کو خبردار کیا ہے کہ ایران یا اس کے بینکاری شعبے کے ساتھ لین دین کرنے پر انہیں امریکی پابندیوں کا سامنا کرنا پڑ سکتا ہے۔ امریکی محکمہ خزانہ کے مطابق پابندیوں کی زد میں آنے والے ایرانی مالیاتی اداروں کے ساتھ کاروبار جاری رکھنے والے غیر ملکی اداروں کو پیشگی اطلاع کے بغیر کسی بھی وقت نشانہ بنایا جاسکتا ہے۔ ایسے اداروں کو ایران سے متعلق کاروباری سرگرمیاں اور مالیاتی روابط فوری ختم کرنے کی ہدایت کی گئی ہے۔

امریکا نے فروری کے آخر میں ایران کے خلاف جنگ شروع کی تھی، جس کے دوران ایرانی قیادت کو نشانہ بنایا گیا اور تہران سے جوہری سرگرمیاں ختم کرنے کا مطالبہ کیا گیا۔ جنگ کے نتیجے میں مشرقِ وسطی میں تشدد بڑھا، جبکہ ایران کی جوابی کارروائیوں اور ایک اہم تجارتی راستے کی بندش کے باعث عالمی سطح پر توانائی اور کھاد کی قیمتوں میں نمایاں اضافہ ہوا۔

اگست کے آخر سے امریکہ نے ایران کو معاشی طور پر تنہا کرنے کی کوششیں تیز کر دی تھی اور اپنے اتحادیوں کو خبردار کیا کہ ایرانی حکومت کے ساتھ لین دین جاری رکھنے پر انہیں بھی پابندیوں کا سامنا کرنا پڑ سکتا ہے۔

امریکی محکمہ خزانہ نے ایران کے مالیاتی، کرپٹو کرنسی، ریلوے، گاڑیوں اور مینوفیکچرنگ کے شعبوں پر بھی نئی پابندیاں عائد کی ہیں۔ اس کے علاوہ ایران کی حکومت کی مبینہ مدد کرنے پر متحدہ عرب امارات اور ترکیہ کے دو بینکوں کے خلاف بھی کارروائی کی گئی ہے۔

امریکی محکمہ خزانہ کے مطابق ایرانی حکومت امریکی پابندیوں سے بچنے کے لیے خفیہ مالیاتی نیٹ ورکس، جنہیں ’شیڈو بینکنگ‘ کہا جاتا ہے، استعمال کرتی ہے۔ غیر ملکی مالیاتی اداروں کو ایسے نیٹ ورکس کی نشاندہی کرنے اور ان سے ہر قسم کے لین دین سے گریز کرنے کی ہدایت کی گئی ہے۔