مسجد الحرام میں خودکش بمبار کی خبریں سچ نہیں، خوف پھیلانے والے کو گرفتار کر لیاہے: سعودی حکام

سعودی حکام نے امریکی سوشل میڈیا پلیٹ فارم ایکس پر جاری بیان میں کہا کہ ’مقدس شہر میں سکیورٹی حکام نے راہ گیروں کو ہراساں کرنے اور ان میں خوف و ہراس پھیلانے والے ایک شخص کو گرفتار کیا اور فوری طور پر تحقیقات کا عمل شروع کر دیا ہے۔‘

ترکیہ کی خبر ایجنسی انادلو کی رپورٹ کے مطابق سعودی حکام نے بیان میں کہا گیا کہ سکیورٹی حکام اس واقعے سے متعلق گردش کرنے والے ان دعوؤں کو بے بنیاد قرار دیتے ہیں۔

حکام نے گرفتار شخص کے بارے میں مزید تفصیلات فراہم نہیں کیں۔

اس سے قبل سوشل میڈیا پر گردش کرنے والے دعوؤں میں کہا گیا تھا کہ دھماکا خیز مواد سے بھری جیکٹ پہنے ایک مشتبہ خودکش بمبار خانہ کعبہ کی جانب بڑھا تھا، تاہم سکیورٹی اہلکاروں نے اسے گرفتار کرلیا۔

کعبہ سعودی عرب کے شہر مکہ کی مسجد الحرام کے مرکز میں واقع مکعب عمارت ہے اور یہ مسلمانوں کے لیے مقدس ترین مقام ہے۔