امید ہے ایران کے خلاف جاری جنگ جلد ختم ہو جائے گی: ڈونلڈ ٹرمپ

جب کہ ایک اور میڈیا رپورٹ میں کہا گیا ہے کہ ’وہ اقوام متحدہ کی جنرل اسمبلی کے موقع پر منگل کو خلیجی رہنماؤں سے اس تنازع پر بات چیت کے لیے ملاقات کریں گے۔‘

امریکی صدر کا یہ بیان ایسے وقت میں سامنے آیا جب ایران کے ساتھ امریکہ کی جنگ ساتویں مہینے میں داخل ہو چکی ہے اور فوری خاتمے کے کوئی آثار نظر نہیں آ رہے۔

امریکی نیوز ویب سائٹ ’ایکزیوس‘ کے مطابق ’صدر ٹرمپ آئندہ ہفتے اقوام متحدہ کی جنرل اسمبلی کے اجلاس کے موقع پر نیویارک میں خلیج تعاون کونسل کے رہنماؤں سے ملاقات کریں گے، ملاقات میں جنگ کے بعد کی حکمت عملی کے لیے امریکی منصوبوں پر توجہ مرکوز کیے جانے کا امکان ہے۔‘

رپورٹ میں مزید کہا گیا ہے کہ اس ملاقات میں سعودی عرب، متحدہ عرب امارات، قطر، بحرین، کویت اور عمان کے رہنما یا وزرائے خارجہ شریک ہوں گے۔

جبکہ محکمہ خارجہ اور وائٹ ہاؤس نے تبصرے کی درخواستوں کا جواب نہیں دیا۔

صدر ٹرمپ نے صحافیوں سے بات کرتے ہوئے کہا کہ ’امید ہے کہ ہم جنگ کے خاتمے کی طرف بڑھ رہے ہیں‘۔

ایران کے حوالے سے اپنے گزشتہ بیانات کو دہراتے ہوئے انہوں نے کہا کہ ’وہ معاہدہ کرنا چاہتے ہیں۔ دیکھتے ہیں کہ یہ کیسے ہوتاہے‘۔

ٹرمپ نے یہ بھی کہا کہ ’انہیں ایران کی طرف سے براہ راست پیغام موصول ہوا ہے، تاہم انہوں نے اس کی مزید تفصیل نہیں بتائی۔‘

ٹرمپ نے اس جنگ کے لیے مختلف اہداف اور ٹائم لائنز پیش کی ہیں جو 28 فروری کو امریکہ اور اسرائیل کے ایران پر حملوں اور ایران کے جوابی حملوں سے شروع ہوئی تھی۔

واضح رہے کہ ایران پر امریکہ اور اسرائیل کے حملوں اور لبنان پر اسرائیلی حملوں کے نتیجے میں ہزاروں افراد ہلاک اور لاکھوں بے گھر ہو چکے ہیں۔

ٹرمپ نے ایران کی جوہری صلاحیتوں کو کمزور کرنے کو اپنے جنگی مقاصد میں سے ایک قرار دیا ہے، ایران کے پاس جوہری ہتھیار نہیں ہیں اور ان کا مزید کہنا ہے کہ اس کا یورینیم افزودگی کا پروگرام پرامن مقاصد کے لیے ہے، جبکہ امریکہ جوہری ہتھیار رکھتا ہے۔

ایران کے خلاف امریکہ اور اسرائیلی جنگ کی وجہ سے تیل اور گیس کی قیمتوں میں اضافہ نومبر کے مڈٹرم انتخابات سے قبل ٹرمپ کی ریپبلکن پارٹی کے لیے ایک بڑا مسئلہ بن گیا ہے۔