حوثی حملے میں 13 افراد زخمی، ’سعودی عرب اس کا فیصلہ کن جواب دے گا‘

سعودی عرب کی جانب سے یمنی حوثیوں کی جانب سے کیے گئے حملے کے جواب میں کہا گیا ہے کہ ’سعودی عرب فیصلہ کن جواب دے گا۔‘

ترجمان کے مطابق حملوں میں سات گھروں اور دو گاڑیوں کو بھی نقصان پہنچا۔ انہوں نے حوثیوں پر شہریوں اور شہری تنصیبات کو جان بوجھ کر نشانہ بنانے کا الزام عائد کرتے ہوئے کہا کہ ’مزید حملوں کی روک تھام کے حق کے تحت سعودی عرب ضروری اقدامات کرے گا۔‘

دوسری جانب سعودی سول ڈیفنس نے منگل کی صبع جدہ، ینیع، طائف، ابھا، جازان اور العلا میں ممکنہ خطرے کے الرٹس جاری کیے، تاہم بعد میں بتایا کہ خطرہ ٹل گیا۔ شہریوں کو ہدایت کی گئی کہ سول ڈیفنس کی ہدایات پر عمل کریں، اجتماعات اور حملوں کی ویڈیوز بنانے سے گریز کریں اور ہنگامی صورتحال میں 911 پر رابطہ کریں۔

حوثی فوجی ترجمان یحییٰ سریع نے پیر کو دعویٰ کیا کہ سعودی جنگی طیاروں نے گزشتہ 24 گھنٹوں کے دوران یمن کے 5 صوبوں میں 54 حملے کیے۔ ان کے مطابق ان حملوں میں ایف-15 اور ٹائفون جنگی طیارے استعمال ہوئے اور انہوں نے خبردار کیا کہ ان حملوں کا جواب دیا جائے گا۔

رپورٹ کے مطابق حوثیوں نے اسی روز خمیس مشیط میں کنگ خالد ایئربیس پر بڑے پیمانے پر میزائل اور ڈرون حملے کا بھی دعویٰ کیا اور سعودی عرب کے خلاف کارروائیاں مزید بڑھانے کی دھمکی دی۔

یمن کی بین الاقوامی طور پر تسلیم شدہ حکومت کی فورسز اور حوثیوں کے درمیان جھڑپوں میں جولائی کے آغاز سے شدت آئی ہے۔ یمن میں 2014 سے جنگ جاری ہے، جب حوثیوں نے دارالحکومت صنعا اور کئی صوبوں پر قبضہ کیا تھا۔