سعودی عرب کے دفاع کے لیے ہر ممکن تعاون فراہم کر رہے ہیں اور کرتے رہیں گے: ڈی جی آئی ایس پی آر

انہوں نے سعودی ویب سائٹ ’انڈیپینڈنٹ عربیہ‘ کو بتایا کہ ’پاکستان کا مؤقف یہ ہے کہ اس بات پر سمجھوتہ نہیں کیا جا سکتا۔‘

ڈی جی آئی ایس پی آر نے کہا کہ ’سعودی عرب کے دفاع کے لیے جو بھی تعاون درکار ہے، وہ فراہم کیا جا رہا ہے اور کیا جاتا رہے گا۔‘

ان کے یہ ریمارکس ایک ایسے وقت میں سامنے آئے ہیں جب حالیہ ہفتوں میں حوثی باغیوں کی جانب سے سعودی عرب کے ہوائی اڈوں سمیت تیل اور مالیاتی انفراسٹرکچر کو نشانہ بنانے والے حملے جاری ہیں۔

ترجمان نے کہا کہ ’سعودی عرب کی خودمختاری، علاقائی سالمیت اور حرمین شریفین کا تحفظ پاکستان کے لیے سب سے اہم ہے اور اس پر کوئی اگر مگر صورت حال نہیں ہے۔‘

واضح رہے کہ پاکستان اور سعودی عرب نے اجتماعی دفاعی صلاحیت کے مقصد سے دو دفاعی معاہدوں ’اسٹریٹجک باہمی دفاعی معاہدہ‘ اور ’مکہ مشترکہ دفاعی اتحاد‘ پر دستخط کیے ہیں، جس میں ترکیہ بھی شامل ہے اور 7 اگست کو طے پانے والے ’مکہ معاہدے‘کے تحت ایک رکن پر حملہ تینوں پر حملہ تصور کیا جائے گا۔

اقوام متحدہ کے چارٹر کے آرٹیکل 51 کا حوالہ دیتے ہوئے انہوں نے کہا کہ ’یہ اتحاد علاقائی استحکام کے خلاف خطرات کو روکنے کے لیے ہے اور عدم استحکام پھیلانے والے عناصر کے لیے واضح پیغام ہے کہ اگر آپ نے براہِ راست یا بالواسطہ ان تینوں ممالک میں سے کسی کے بھی خلاف یہ جنگ چھیڑی، تو ردِعمل اجتماعی ہوگا۔‘

تاہم انہوں نے اس بات پر زور دیا کہ ’متعلقہ فریقین کے ساتھ پاکستان کے روابط اور بات چیت کا مقصد کشیدگی کو کم کرنا ہے۔‘