ڈرون حملوں کے جواب میں پاکستان نے افغانستان کے 10 مقامات پر ڈرون حملے کیے: وزارت اطلاعات

وزیر اطلاعات عطا تارڑ نے جمعرات کو کہا کہ ’پاکستان کے فضائی دفاعی نظام نے بدھ کو افغانستان سے لانچ کیے گئے ڈرونز کا پتہ لگایا، جنہیں اپنے مقررہ اہداف تک پہنچنے سے پہلے ہی ٹریک کرکے تباہ کر دیا گیا۔‘

عطا تارڑ نے کہا کہ افغان طالبان کی جانب سے کسی بھی مزید اشتعال انگیز اقدام کا ’مضبوط اور فیصلہ کن جواب‘ دیا جائے گا۔

دوسری جانب خوست کے گورنر کے ترجمان مستغفر گرباز نے کہا کہ پاکستانی فضائی حملے جنوب مشرقی صوبے خوست کے مختلف علاقوں میں کیے گئے۔ ان کے مطابق حملوں میں کوئی جانی نقصان نہیں ہوا۔

پاکستان اور افغانستان کے درمیان کشیدگی ایک بار پھر بڑھ گئی ہے۔ دونوں ممالک کے درمیان شدت پسندوں کے حملوں پر طویل عرصے سے اختلافات ہیں، جن کے باعث فروری میں کئی برسوں کی بدترین لڑائی بھی ہوئی تھی۔

اسلام آباد کا الزام ہے کہ کابل ایسے عسکریت پسندوں کو پناہ دے رہاہے جو سرحد پار پاکستان میں حملے کرتے ہیں۔ تاہم افغان طالبان حکومت ان الزام کی تردید کرتی ہے اور ان کا مؤقف ہے کہ عسکریت پسندی پاکستان کا داخلی مسئلہ ہے۔

پاکستانی حکومت نے رواں ہفتے کے آغاز میں بھی افغانستان اور پاکستان کے سرحدی علاقے میں فضائی حملوں کا کہا تھا۔ ان حملوں میں 28 عسکریت پسند ہلاک ہوئے۔ افغان طالبان حکام نے الزام عائد کیا تھا کہ رات گئے کیے گئے حملوں میں افغان سرزمین پر 3 شہری ہلاک ہوئے۔

دونوں ممالک کے درمیان کشیدگی گزشتہ ہفتے شمال مغربی پاکستان میں پولیس کی ایک تنصیب پر حملے کے بعد دوبارہ بڑھی، جس میں کم از کم 24 افراد ہلاک ہوئے تھے۔ اس سے قبل تقریباً 3 ماہ تک دونوں ممالک کے درمیان نسبتاً کشیدگی کم رہی تھی۔

اسلام آباد نے اس الزام کو مسترد کرتے ہوئے کہا تھا کہ حملوں میں ’فوجی تنصیبات اور دہشت گردوں کے انفراسٹرکچر‘ کو درست طور پر نشانہ بنایا گیا۔